تورکم، منه چوخ فارسی قیریلداتما، آی اوغلان…!
چوخ ییرغالانیب قاش گوزونو آتما،آی اوغلان
تورکم، منه چوخ فارسی قیریلداتما آی اوغلان
علم اولماسا موشکول دؤنوب آسان اولا بیلمز
ائللر سؤزودور: تولکودن آسلان اولا بیلمز
ائل درد و غمین قانمایان اینسان اولا بیلمز
هرزه گولو ائل گول‌لرینه قاتما آی اوغلان
تورکم منه چوخ فارسی قیریلداتما آی اوغلان
آرتیق چالیشیب دوزلره اوخشاتما یالانی
تورکون آتینا تیکمه یاراشدیرما پالانی
آز بیلمه دماونددن اوغلان ساوالانی
ائل قارغیش ائدر بوغدا وئریب ساققیز آلانی
میسدن اؤترو آل قیزیلی ساتما آی اوغلان
تورکم، منه چوخ فارسی قیریلداتما آی اوغلان
باخ تاریخه گؤر کیم ده‌ده‌نه خور باخیب اوغلان
اینسان آدینی دفتره کیم یازدیریب اوغلان
کیم بابکی ساتدی عربه خانه‌سی ویران
کیم ائتدی خیانت بؤلونوب آذربایجان؟
غفلت یوخوسوندا بو قدر یاتما آی اوغلان
تورکم منه چوخ فارسی قیریلداتما آی اوغلان
مشروطه‌لیگی کیم گتیریب ایرانا یولداش؟
ستّارخانی کیملر چاغیریب تهرانا یولداش؟
دالدان کیم آتیب گوللـه‌نی ستّارخانا یولداش؟
کیم قاره‌باغی هدیه وئریب ایروانا یولداش؟
بسدیر باشا دوش باغریمی چاتلاتما آی اوغلان
تورکم منه چوخ فارسی قیریلداتما آی اوغلان
بیز یاندیران اودلاردا بوگون یاندی اوشاقلار
پیس گونده یامان یئرده آیاقلاندی اوشاقلار
داندیق دیلی بیز ریشه‌سینی داندی اوشاقلار
ایندی بیزه یوخ یادلارا قوربان‌دی اوشاقلار
بوش بوش دانیشیب بئینیمی لاخلاتما آی اوغلان
تورکم منه چوخ فارسی قیریلداتما آی اوغلان
من سؤیله‌میرم: دیللری اؤیرشمه دانیشما
یانسین اوره‌ییم باشی دئسم فارسا قاریشما
آنجاق دئییرم: یادلارا چوخ یانما آلیشما
هر کیم ائلینی دانسا کوسوب اونلا باریشما
گولسن خار اولوب ائل گؤزونه باتما آی اوغلان
تورکم منه چوخ فارسی قیریلداتمادآی اوغلان
دوشمن اوزونه گولسه اینان تازه کلک‌دی
پروانه دئییل شمعلره اوغلان کپنک‌دی
آیریلمازا واجیب سؤزون آشکارا دئمک‌دی
تورکون دیلینین اوستادی آللاه‌دی ملک‌دی
شئیطانی اهورا بئلینه چاتما آی اوغلان
تورکم منه چوخ فارسی قیریلداتما آی اوغلان
سوز:آیریلماز
Comments are closed.