میللی فعال مهندس محمد عباسپور دونیاسینی دییشدی

خوی شهری‌نین سئویملی اوغلو، شریف دانشگاهی‌نین ماذونو، عزیز دوست و میللی فعال مهندس محمد عباسپور دونیاسینی دییشدی و غملریمیز اوستونه غم قالادی.
تقریبن ۲۰ ایل اوول محمد عباسپورا شوخلوغا سانای‌ین آتاسی دئیردیک. چونکو او گونلر اونون کیچیک قیزی سانای، ستارخان مراسیمیندن اللر اوستونه قالخیب شعر اوخوماقلا اونودولماز بیر صحنه یاراتمیشدی و اونا گؤره بعضن محمدی قیزی سانای‌لا تانییب و اونا سانای‌ین آتاسی دئیردیلر.
سونرالار سیخ سیخ گؤروشوب، دانیشاردیق و چوخلو ایشلرده بیرلیک‌ده چالیشاردیق. نه یازیق کی تورپاق محمده یئریکله‌میشدی و اونو بیزدن آلدی.
ابراهیم جعفرزاده، مینا کهربایی و اونلارین کیچیک قیزی آیلانین یاس مراسیمینده دانیشیق وظیفه‌سینی بیز اوچ نفره وئرمیشدیلر و حسن دمیرچی، محمد عباسپور و من او مراسیمده ابراهیم و مینا حاقدا دانیشدیق و ایندی محمد حایاتا گؤز یومدو و بیلدییم قدر محمود بی فضلی اونون یانیندادیر.
محمد عباسپور میللی فعالیت‌لریندن علاوه شهرلریمیزین خسته‌خانالارینی طبی دستگاهلارلا تجهیز ائتمکده بؤیوک آددیملار آتمیشدی و اونون میراثی شهرلریمیزده یاشاییب خالقیمیزا یاشام باغیشلایاجاق. او داغچی‌لیغی چوخ سئوردی و یقین روحو ابدی اولاراق داغلاریمیزی دولاشاجاق.
دولاشیرام ائللری
کؤکسومده هیجانیم
گئجیکسه ده باهاریم
اوجالیقدان ائنمه، سن
ائنمه آذربایجانیم