دگیرمان بیلدیگینی ائدیر، چاخ چاخ یالنیز باش آغریدیر
ابراهیم رشیدی
یئنه ایران مئدیالاری آغیل‌لارینا گلنی یوخ، آغیزلارینا گلنی آذربایجان جمهورییتینه قارشی اورتایا تؤکورلر. چونکو بونلار آذربایجانی دونیا گوجلری‌نین منطقه نماینده‌سی گؤروب، گوج مرکزلرینه زورلاری چاتمایاندا، بونو تاپداماق ایسته‌ییرلر. کئشگه یوخولاریز چین اولسون و آذربایجان سوپر گوجلرین منطقه نماینده‌سی.
بو دفعه آذربایجان فعاللاری بو باغیرتی‌لار قارشی‌سیندا فرقلی داورانیب و اؤزلرینی سویوق قانلی، ساکین و توخداق آپاریب، سابق دفعه‌لره تای بیزیم‌کی‌لر اونلارا قارشی قیزمیرلار. چونکو هامی بونلارین بوش ادعالار و دانیشیق‌لارینا آلیشیب و بیزیم‌کی‌لر بونلارا «سیز هله آزجا سس کوی سالین، بیزیم کروانیمیز اؤز یولونو گئتسین» دئمک ایسته‌ییرلر.
شاعیرلر دئمیشکن «هم کعبه هم بتخانه، بهانه‌دی بهانه» و بونلارین آذربایجانا قارشی آددیملاری، اسرائیل یا باشقاسینا ربطی یوخدور، بلکه آیی‌نین مین‌بیر اویونو، کال آرمود اوستونده‌دیر و اساس درد بو جغرافیادا یاشایان تورکلرین گونو گوندن اویانیب، دوست دوشمانی تانیماسی‌دی.
آما دای بو گؤزلرینی یوموب، آغیزلارینی آچان متوهم جماعتین هده قورخو گلمه‌سینه قولاق وئرن یوخدور و قدیمکی‌لر دئمیشکن دگیرمان بیلدیگینی ائدیر، چاخ چاخ یالنیز باش آغریدیر. دانیشین، اؤزو ده چوخ یئکه یئکه دانیشین، مثلن دئیین دوه.
Comments are closed.