مراجعت

ایران ممالیکی محروسه سی ایله اؤزونو تعریف ائدن و اؤزونو ایرانلی قلمه آلان آذربایجانلیلارین دقتینه

تهرانداکی فارس حؤکومتی آذربایجانلیلاری بیر ملی وارلیق اولاراق هضم ائده بیلمدیگی اوچون، کئچمیش 30 ایلده آذربایجان تورپاقلاری ائرمنی اشغالچیلیغی آلتیندا اولارکن “مناقشه قره باغ باید از طریق گفتگو حل شود” دئمکله قاراباغین شهرلری و کند بینالاری نین بوتون قاپی پنجره سی، دیرکلری اوراق دمیر پارچاسی اولاراق سؤکولدو و ایرانا خام مواد کیمی سو قیمتینه ساتیلدی.
بو 30 ایلده آذربایجان جمهوریتینده نه اسراعیل آدلی بیر خوخو گؤرونردی، نه ده ائرمنی اشغالچیلیغینا دور دئمک اوچون بیر مسلمان دؤلتی، خصوصا شیعه دؤلتی تاپیلاردی، هئچ بیری تاپیلمازدی. مسئله بئله اولدوقدا آذربایجان سیاستچیلری تدبیر تؤکمگه و بو مسئله-دن چیخیش یولو تاپماغا چالیشدیلار. بو چیخیش یوللاریندان بیری، اوچ بؤیوک رقیب و قافقازلار اوغروندا رقابت ائدن دؤلتلرین سیاستلرینی قافقازلاردا ترازلاشدیرماق اولدو.
ائرمنیلری ایسه، آذربایجانین اشغال اولموش توپراقلاریندا ایکینجی بیر ائرمنی دؤلتی یارتماغا و اونا “آرتساخ” آدی وئرمگه چالیشدیلار. بئله بیر شراییطده ائرمنیلرین بو اوزدن ایراق “آرتساخ” آد وئردیکلری اشغالچی مؤسسیسه لر ده ایراندان گئتمیش یاناجاق، نظامی سورسات ماتئریاللاری ایله تآمین اولونوردو. پاشینیان دا بیر آوانتوریست سیاستچی اولاراق شوشانین جیدیر دوزونده یاللی اویناماغا چالیشمیشدی. اؤزلرینی جموری اسلامی ایران آدلاندیران فارس حؤکومتی ده بو خوشونا گلجک وضعیتده نظاره ائده رک قویروغو ایله جویز سیندیرماغا و “دیل ای دیل ای” دئیه رک فارس ایستعمارچیلیق سازینی کؤکله رک دشتی هاواسی اوخوماغا باشلامیشدی.
غرب دؤلتلری، باشدا فرانسه و آمریکا بیرلشمیش دؤلتلری اولاراق ائرمنی لوبیسی واسیطه سی ایله یانیب کوله دؤنموش اشغال آلتیندا اولان آذربایجانین تورپاقلاری “آرتساخ” دئیه رسمیته تانیماغا حاضیرلانماغا باشلامیشدی.
بئله بیر شراییط و وضعیتده آذربایجان جمهوریتی نین فرصت الدن وئرمه سی و فرانسه و آمریکا کیمی بؤیوک دؤلتلری “توروس” مؤسسه سی واسیطه سی ایله ائرمنستانا روسیه و ایرانا یئرینه تازا رقیبلر یئرلشدیرمگی آذربایجان تورپاقلاری نین بیر دفعه لیک (همیشه لیک) ایتیریلمه سینه یول آچاردی. آذربایجان جمهوریتی قافقازدا بؤیوک دؤلتلرین سیاستلرینی بالانلاشدیردیقدان سونرا، آرتیق نظامی عمل ائتمه سی نین واقتی ایدی، ائله ده اولماغا باشلادی.
بئله بیر وضعیتده فارس ایستعمار گوجلری ، اونلارین جراییدلری (مشرق، فارس و ها بئله ایرانشهر محفللری و فارس مدنیت راسیستلری) و شیعه لیگی فارسلیق اوچون وسیله ائتمیش ایستعمار عامیللری قافقازلاردا فانوس ایله “داعش” و “تکفیری” آختارماغا باشلادیلار.
دئدیکلری و توخودوقلاری یالان اولدوغو و آذربایجان دؤلتی منظم قوشونو و اوردوسو ایله ساواشدیغی اوچون 44 گون ایچینده ائرمنی اوردوسو و ائرمنستان افلاسا اوغرایاراق پوتینی آتیشکس اوچون واسیطه ائتدی.
او آتیش کسه اساسن ائرمنی اشغالچی گوجلری قاراباغی ترک ائتمه لی و پارامیلیتئر ائرمنی تئروریستلری روسلار خلع سلاح ائتمه لی ایدی و آذربایجان جمهوریتینی نخجیوانا باغلایان زنگه زور دهلیزی آچیلمالی ایدی.
او زامانلار ایران جراییدی ده قافقازلاردا ایرانین ائرمنی یانچیسی یئریتدیگی سیاستین یانلیش اولدوغونو و ایرانین قافقازلاردا مغلوب اولدوغونو یازدیلار. قاراباغا ایسه هر هانکی خاریجه لی دیپلومات و خاریجی گوجلرین گیریش و چیخیشی آذربایجان دؤلتی نین اجازه سی ایله اولمالی ایدی.
آذربایجان دؤلتی ایستر روسیه مقاملاری و ایسترسه ده ایران طرفینه بیزیم دؤلت نورمالاریمیزی رعایت ائدین دئیه مراجعت ائتسه ده کئچمیش 30 ایلده اولدوغو کیمی گئنه ده ایران طرفی بو مسئله نی قولاغی نین آردینا آتماغا چالیشدی.
روسیه کمونیستلیگی زامانیندا بیلیندیگی کیمی گؤروس و قاپان آراسینداکی یول آذربایجان جمهوریتی تورپاقلاریندان کئچدیگینه باخمایاراق دؤلتلر سرحدی دئیه آذربایجان بو یولو باغلامالی، یوخسا کنترول آلتینا آلاراق کئچری و موقتی لازیملی شرطلر آلتیندا ائرمنی ماشینلارینا گل گئت ایمکانی وئرمه لی ایدی. ائله ده اولموشدو. آنجاق تبریزدن آذربایجانین خانکندینه ائرمنیستان اوزریندن ایران ماشینلاری نین یوک داشینماسینا ایران و ائرمنستان دؤلتلری پلاک دگیشدیرمک واسیطه سی ایله دون گئیدیرمکلری آذربایجان جمهوریتی مقاملاری نین صبر کاساسینی داشیرمیش اولدو.
بئله لیکله ده فارس حؤکومتی بو یول “داعش” و “تکفیری” یئرینه بیر اسراعیل اختراع ائتدیلر. بو اسراعیل قولاغا ائشیده لی داها دا خطرلی ساییلار. آنجاق 8 ایل ایران و عراق ساواشیندا اسراعیل سیلاحلارینی فارس حؤکومتی اود قیمتینه آلاراق عراق حؤکومتی ایله ساواشارکن اسراعیل هئچ ده پیس دئییلمیش.
آنجاق آذربایجان جمهوریتی بیر ملت دؤلتی اولاراق فارسلیق قونشولوغوندا یاشاماسی فارسلیق اوچون بیر زهر ساییلارمیش. دئمک، فارس ایستعمار گوجلری ایرانی ملیتلر اوچون بیر انسانلیق دؤلتی ائتمک یئرینه آذربایجان تورکلوگونو ییر ملت اولاراق باشی آشاغا ساخلاماغا و زامان مجراسیندا آذربایجان تورکلوگونو شیعه دئیه فارس ایستعمارچیلیغی ترکیبینده یوخ ائتمگه چالیشارلار.
مسئله بئله اولدوقدا، بوگون آذربایجام دؤلتچیلیگی آذربایجان تورکلوگونون اؤلوم، یوخسا قالیم مسئله سیدیر. بیر ملتین اؤلوم، یوخسا قالیمی نین داها دا “گونئی (جنوب) و قوزئی (شمالی) اولماز. دئمک، گونئی آذربایجان تورکلوگو آییق و ساییق اولمالیدیر. فارس ایستعمارچیلیغی نین شیعه دونونا بورنموش و اسلامیتدن لباس اوغورلامیش ذاتلارینا، ائله جه ده فارس مدنیت راسیستلیگینی اؤزونه ملی کیملیک دئیه قلمه آلان آوانتوریست و راسیست محفللره یوخ دئمکله قارداش قیرقینیندان اوزاق دورماغا چالیشمالیدیر.

ایشیق سؤنمز، 02.10.2021

Comments are closed.