تورک مدنی فعاللار ۳۰۰ گوندور اوین حبس‌خاناسیندا ساخلانیلیر
«آیاز سیف خواه»، «آراز امان»، «مرتضی پروین»، «طاهر نقوی»، «حسین پیری» و «باقر حاجی‌زاده»، ۳۰۰ گوندور کی اوین حبس‌خاناسیندا ساخلانیلیرلار.
بو آذربایجانلی فعاللار ۱۴۰۲-جی ایل ۱۶-۱۸ بهمن تاریخلرینده گوونلیک گوجلری طرفیندن حبس اولوندوقدان سونرا گوونلیک اورقانلاری‌نین موداخیله‌سی و محکمه اورقانلاری‌نین مانع‌لری سببیندن مووقتی اولاراق گیروو قارشیلیغیندا سربست بوراخیلماییب و هله ده حبسده‌دیرلر.
بیر آی اؤنجه، تهران اینقیلاب محکمه‌‌سی‌نین ۱۵-جی شؤبه‌سی‌نین باشقانی حاکم “ابوالقاسم صلواتی” طرفیندن ۱۲ تورک مدنی فعالا توپلامدا ۸۸ ایل حبس و سوسیال خیدمتلردن و پارتییالارا عضو اولماقدان محرومیت جزاسی وئریلیب.
بو فعاللار، “داخیلی و خاریجی گوونلیگه قارشی جینایتلر تؤرتمک اوچون توپلاشماق و البیر اولماق، ایران ایسلام جمهورییتینه قارشی تبلیغات و جاسوسلوق” اتهامی ایله بو جزالارا محکوم ائدیلیبلر.
باقر حاجی‌زاده، آیاز سیف‌خواه و آراز امان ۱۳ ایل، ودود اسدی ۹ ایل و ۶ آی، عبدالعزیز عظیمی قدیم ۶ ایل، مرتضی پروین جدا ۶ ایل و ۲ ایل سوسیال حوقوقلاردان و پارتییا و قروپلارا عضولوکدن محرومیت، طاهر نقوی ۶ ایل حبس جزاسی ۲ ایل اؤلکه‌دن چیخیش قاداغاسی و ۲ ایل سوسیال حوقوقلاردان و پارتییا و قروپلارا عضولوکدن محرومیت، سالار طاهرافشار، حسین پیری و سعید مینایی هر بیری ۵ ایل، کمال نوریو سلیمان محمدی ده ۳ ایل حبسه محکوم ائدیلیبلر.
IRANWIRE
Comments are closed.