گؤرکملی ژورنالیست، شاعر، مترجم مژگان خانیم صیامی ابدیته قووشدو
چوخ تاسفله، گؤرکملی ژورنالیست، شاعر، مترجم ، «سارای» درگیسی‌نین صاحیبی و باش یازاری، اردبیل ادبی محیطی‌نین تانینمیش مدنی سیماسی «مژگان خانیم صیامی» فروردین آیی‌نین 18_ ایی یاشادیغی اردبیل شهرینده ابدیته قووشدو.
مژگان صیامی 1385 اینجی ایل ده “سارای” درگی سی نین امتیازینی آلیر. او سارای درگی سینین 45 سایی نی چیخاریب، اوندان بیر کتاب (سون سکانس) ، 15 دنه تورکی حئکایه لری , 5 جلد (اردبیل نامه)چاپ ائدیلیبدیر . “اشک سبلان”، ابراهیم دارابی جنابلاری نین رمانین تورکجه یه چئویریبدیر (ساوالانین گوز یاشی) . اونون “قربانیان بند نسوان” زندان دا یازدیغی کتاب کئچن ایللرده ایشیق اوزو گوروبدور، “مردگان باغ سبز”، محمد رضا بایرامی جنابلاری نین رمانین، تورکجه یه چئویریبدیر. “یاشیل مئشه نین اولولری “سون ایشلریندندیر.
خانم صیامی حیات یولداشیندان اونا اجتماعی – مدنی ایشلرینه مانع یاراتدیغی اوچون آیریلماق مجبوریتینده قالیبدیر . روحو شاد و خاطره سی عزیزاولسون.
آلمالیـــقدا : مژگان صیامی دن
«آذر» آیـــی‌نین آلا قارغالارینا دوشونــوردوم…
قاتار – قاتار
آلاتوراندا
قاپ – قارا شـــه‌وه گــــؤزلری ایله
ساوالانیـــن
آغ – آپباق ساچلارینا قونمـــوش؛
قوجا فایتونچـــی دئمیشکــن
سانکی نحــس بیر گله‌جه‌یی باغیـــریردیلار…
…. شــوبهه‌لی کــؤلگه‌لر
پیچیلتــــی دانیشیق‌لار
چیرپینیپ چابالایانلار
چاره‌سیــز سینیـــردان کئچن‌لر
اوزلرینه اؤرتولـــن قاپی‌لار
باغیریـــب چاغیرانلار
هارایلارینا سس وئرمه‌ین اجنبی‌لر
جاناوار سایاغی زینداندان قورتولان کافتار خان‌لار
قانلی گؤزلری ایله انتقام دالی‌ســـوره قاچان‌لار
«خالق» کلمه‌سینی یامسیلاییب
«آذربایجان» دئیه، شاققیلتـــی ایله گولوب
آت اوسته آتـــش ائده‌ن ظالیم‌لر
ایگیــدسیز گلیــن‌لر
امنیت‌سیز دام- دووارلاردا
چاپیچـــی‌لارین هـــرزه باخیـــشلارینا اووولانان‌لار
قارشــــی قارشی‌یا
سیلاحسیز ساواش‌لار…
قان! قار ایچیــــنده سوزولوب
دهشت یاییلیب بوتون تورپاغیمیزا
آه اولـــو ساوالان!
ندنسه باغریـــن چاتلاماییب سنین؟!
آغلا! پارتلاماسین اوره‌ییـــن
گــــؤز یاشینا قــــوربان اولوم
شاه داغیـــــم،
ساوالانیــــم…!
Comments are closed.