آیاغا دور تبریزیم- شاعر:سلیمان رستم خانلی

لینک : آیاغا دور تبریزیم

آیاغا دور تبریزیم شعری قدیم تبریز شهرینه عایید اولان فتولار اوستونه میکس اولموش کلیپ

شاعر:سلیمان رستم خانلی
دیکلمه:نورالدین قولی یئف

باخدیقجا حوسنونه دویماییر گؤزوم،
تبریزیم، تبریزیم، گؤزل تبریزیم!
قویمارام یادلاری گیرسین قوینونا،
ایزین وئر، قولومو سالیم بوینونا!
سنین بایرامینا، سنین تویونا
دیلی بیر، قانی بیر قارداشین گلیب،
دردینه آشینا سیرداشین گلیب…
سن چیخدین قارشیما دوزلا، چؤرکله،
باغیندان دردیگین گولله، چیچکله،
ایکییه بؤلونمز صاف بیر اورکله…
تبریزیم، تبریزیم، آمان، تبریزیم!
یوخ اولسون باشیندان دومان، تبریزیم!
بولبول زار-زار آغلار چمندن آیری،
اینسان دئییب-گولمز وطندن آیری،
جان نئجه یاشاسین بدندن آیری؟!
آچ اؤز اورگینی، دانیش، تبریزیم،
اولوم دردلرینله تانیش تبریزیم!
قدرینی آیریلیق چکنلر بیلیر،
هیجرینده گؤز یاشی تؤکنلر بیلیر،
عؤمرونه قارانلیق چؤکنلر بیلیر،-
باغیندان گول، چیچک دردیم، تبریزیم،
یئنه تزلندی دردیم، تبریزیم!
بو آینا بولاقلار، بو آینا سولار،
سودا آیاغینی یویان قارغولار،
دوغورور کؤنلومده مین جور دویغولار،
سسله نیر کامانیم، سازیم، تبریزیم،
ای منیم باهاریم، یازیم، تبریزیم