خطابنامه صدر حکومت ملى آذربایجان٫ سید جعفر پیشه‌ورى به سازمان ملل متحد

دونیانین ان قدیم خالق لاریندان اولان آذربایجان خالقى ئوزونون زنگین میللى تاریخینه مالیک دیر. عصرلرین کشمکئش لرینده او٫ ئوز میللى دیلینى٫ عادت و عنعنه لرینى قورویوب ساخلایابیلمیشدیر. ایران ظلم کارلارى آذربایجانى ئوز حاکمیت لرى آلتینا آلاراق٫ اونون ثروتینى آمان سیزجاسینا تالادیلار. نتیجه ده آذربایجانین چیچکله نن کند و شهرلرى داغیلماق حددینه گلیب چاتدى. شونیست بؤیوک دؤولت چیلیک سیاستی یورودن ایران حکمدارلارى آذربایجانلىلارین وارلیغینى تمامىیله اینکار ائتمه یه جهد گؤستریر٫ اونلارین دیلینى الیندن آلماقدان٫ هر جور تحقیر ائدیجى عمللردن چکینمیرلر.

بونا باخمایاراق آذربایجان خالقى بیر گون ده اولسون٫ ئوز آزادلیغى اوغروندا مبارزه سینى دایاندیرمادى. آذربایجانلىلارین ئوز ملى آزادلیقلارى اوغروندا مبارزه سینین ان پارلاق نمونه سى ستارخان٫ باقرخان٫ شخ محمد خیابانى و باشقالارىنین حرکتلرىدیر. بو جسور انسانلار مبارزه نین باشچىلارى٫ همده شهیدلرى ایدى. قانلى فاشیسم اوزه رینده دموکراتیک دؤولتلرین غلبه سى آذربایجان خالقینین مبارزه سینه ینى تکان وئردى٫ ینى شرایط یاراتدى. تهران حکومتینین مقاومتینه باخمایاراق بو ایل ٢١ آذرینده (١٢ دکابر) آذربایجان خالقینین عصرلردن برى آپاردیغى مبارزه سى غلبه ایله باشا چاتدى. آتلانتیک خارتییاسینا اویغون اولاراق میلى مجلیسین٫ آذربایجان میللى حکومتینین قورولماسى ایله نتیجه لندى.

آذربایجاندا دموکراتیک اساسلارا دایاناراق بیر میلى حکومت قورولوب و ئوز فعالیتى باره ده بوتون دونیایا معلومات یاییب. ٥ میلیونلوق آذربایجان خالقى ملى دیلی نین٫ تاریخی نین٫ مدنییتی نین کمکی ایله ئوزونون معاصر بیر خالق اولدوغونو درک ائتدى و بیر ده هئچ واخت فارس ظولمونون آلتیندا اینله مه یه٫ فارس دیلینین ایرانداکى باشقا خالقلارین دیللرى اوزه رینده آقالیغینا اجازه وئرمه یه جکدیر. بو خالق بیر نفر کیمى ئوز حیاتینى ملى آزادلیغینا و دؤولتینه قوربان وئرمه یه حاضردیر.

ینى دموکراتیک آذربایجان حکومتى قیسا واخت عرضینده اجتماعى٫ اقتصادى٫ مدنى ساحه لرده جدى ده ییشمه لر ائده بیلیب٫ داخلى تهلوکه سیزلیک تام برقرار اولونوب. ینى ملى حکومتین فعالییتى سایه سینده عصرلرله استثمار اولونان خالق عادى انسان شرایطینده یاشاماغا باشلاییب. بونونلا دا او٫ ئوز ملى دؤولتینى قوروماق٫ اونو اداره ائتمه یه قادر اولدوغونو گؤستریر.

آذربایجان خالقینین اراده سى ایله آتلانتیک خارتیاسینا٫ یعنى بؤیوک دموکراتیک دؤولتلرین وعدلرینه اویغون اولاراق قورولان آذربایجان ملى حکومتى آرتیق دانیلماز فاکتدیر. بیرلشمیش میللتلر تشکیلاتى باش آسامبئلییاسینا مراجعتى ایله آذربایجان خالقى خواهش ائدیر کى٫ آذربایجان میللى حکومتىنین وارلیغى فاکتى تانینسین و کناردان موداخیله اولمادان٫ اونا ئوز طالعی نین ئوزو طرفیندن معین لشدیریلمه سینه تامینات وئریلسین.

آذربایجان میللى حؤکومتینین باش وزیرى

سید جعفر پیشه ورى

٢٨ یانوار ١٩٤٦