İRAN AZƏRBAYCANLA SƏRHƏDDƏ NEFT-QAZMA İŞLƏRİNƏ BAŞLAYIR

Muğan bölgəsindəki 13 illik kəşfiyyat işlərindən sonra İran Milli Neft Şirkəti (NIOC) əsas qazma qurğularından birini Azərbaycanla sərhəd yaxınlığında yerləşən şimal bölgəsinə göndərir.

Azerbaycan-ruznamesi.org Report.az-a istinadən xəbər verir ki, neft yatağında 4 milyard bareldən çox yüngül xam neft olacağı təxmin edilir.

NIOC ABŞ-ın 2018-ci ildə tətbiq etdiyi sanksiyaların səbəb olduğu satış və gəlirlərin azalmasına baxmayaraq müxtəlif layihələr həyata keçirməyə davam edir.

İran Neft Nazirliyinin xəbər xidməti “Shana” bildirib ki, hazırda Əhvazın cənub-qərbindəki neft mərkəzində olan sahil qazma qurğusu “Fath 54” 1 310 kilometr (814 mil) məsafədə yerləşən Muğan obasına göndəriləcək və yaxın 2 ayda neft qazma işlərinə başlanılacaq.

“Qazma işlərinin iyun ayının sonunda başlaması üçün daşıma əməliyyatı təxminən 25 gün çəkməlidir. Fəth qazma qurğusunun Əhvazdan Muğana nəqlinə 120 ağır tonnajlı yük maşınları cəlb olunub”, – deyə NIOC-un Ərdəbil şəhəri üzrə podratçısı Əli Rəfieyə deyib.

Qeyd edək ki, İran Milli Neft Şirkəti buradan çıxan nefti yaxınlıqdakı Təbriz şəhərində yerləşən İranın ən böyük neft emalı zavodlarından birinə tədarük etməyə çalışır.