GƏLƏNDƏ YURDUMA NOVRUZ BAYRAMI

Yurdumuz adlanır Odlar diyarı ,
Od qalar,qarşılar hər il baharı ,
Zərdüştdən qalıbdır bu yadigarı .
Çatılar tonqallar,toplaşar hamı,
Gələndə yurduma Novruz bayramı .
************************************
Yurduna tələsər Novruz öncəsi ,
Hamı ilin axır,son çərşənbəsi ,
Süfrəyə düzülər bayram töhfəsi ,
Evin ağsaqqalı yandırar şamı ,
Gələndə yurduma Novruz bayramı .
************************************
Qız evi sahmanlar həyət-bacasın,
Yuyub təmizləyər xalça-palazın,
Bəy evi hazırlar bayram xonçasın,
Göndərər gəlinə oğlan adamı,
Gələndə yurduma Novruz bayramı .
************************************
Uşaqlar növbəylə döyər qapını ,
Qapıdan tullayar dəsmal,şalını ,
Dayanıb gözləyər bayram payını ,
Yığar heybəsinə püstə,badamı,
Gələndə yurduma Novruz bayramı.
************************************
Donmuş bulaqların əriyər gözü ,
Bənövşə bəzəyər aranı,düzü,
İnsanlar qarşılar baharı,yazı ,
Hamı deyib-gülər bayram axşamı ,
Gələndə yurduma Novruz bayramı .
************************************