BMT-də İranın insan haqlarını pozmasına qarşı qətnamə qəbul edildi

BMT Baş Assambleyasının Üçüncü Komitəsi çərşənbə günü, 20 noyabr 2025
də İran İslam Respublikasında sistemli insan haqları pozuntularını qınayan bir
qətnaməni qəbul edib. Kanada tərəfindən irəli sürülən bu sənəd 79 lehinə, 28
əleyhinə və 63 bitərəf səslə qəbul olunub.
Qətnamədə İranda “edamların narahatedici və kəskin şəkildə artması” ilə bağlı
dərin narahatlıq ifadə olunur. Sənəd vurğulayır ki, İran rəsmiləri edam
cəzasından siyasi repressiya, etirazçıların və müxaliflərin susdurulması üçün
alət kimi istifadə edirlər. Xüsusən qadınların və yaşı 18-dən aşağı olanların
edamı ciddi narahatlıq doğuran məsələlər kimi göstərilir.
Qətnamənin diqqətçəkən məqamlarından biri 1980-ci illərdə siyasi məhbusların
kütləvi qətlinə açıq şəkildə istinad etməsidir; bu məsələ ilk dəfə bu səviyyədə
BMT Baş Assambleyasında gündəmə gətirilərək “insanlığa qarşı cinayət”
adlandırılıb.
Sənəddə həmçinin “məcburi itkinliklər”, məhkəməsiz edamlar və qurbanların
dəfn yerlərinin məhv edilməsi qeyd olunur və İran hakimiyyəti “hesabat
verməməkdə” tənqid edilir.
Qətnamədə İran dövlət mediasında yayılan radikal düşüncələrin təqdim olunma
tərzi ilə bağlı narahatlıq da əksini tapıb; sənəddə qeyd olunur ki, bu media
“düşmənçilik, ayrı-seçkilik və zorakılığa çağırışları” təşviq edir və 1980-ci
illərdəki kütləvi edamların ab-havasını xatırladır.
Bu sənəd, BMT Baş Assambleyasının İranın insan haqlarını pozmasına görə
qəbul etdiyi 72-ci qətnamədir və beynəlxalq ictimaiyyətin İranda hüquqi və
vətəndaş vəziyyətinə dair davamlı narahatlığını göstərir.
Iranwire.com