SPİRTLİ İÇKİ SAXLAYAN HADİ ŞALLAQLANARAQ ÖLDÜRÜLDÜ

İranda – Şərqi Azərbaycan vilayətinin Əhər şəhərində spirtli içkilər saxlamaq səbəbilə həbs edilən Hadi Ətazadə adlı azərbaycanlı məhbus şallaq hökmünün icrasından sonra həyatını itirib.

Vilayətin Ədliyyə İdarəsinin rəisi gəncin şallaq hökmünün icrası nəticəsində ölmədiyini irəli sürsə də, Ətazadənin ailəsi isə ədliyyə rəisinin açıqlamalarını rədd edir.

Mərhumun qardaşı Qasım Ətazadə Amerikanın Səsinə video müsahibədə qardaşının şallaq zərbələri nəticəsində iki gün halsız vəziyyətdə qaldıqdan sonra həyatını itirdiyini bildirib.

“Şallaq hökmünü icra etdikdən sonra qardaşım halsız olur. Doktora aparmırlar. İki gün o cür halsız qalır. İki gün sonra xəstəxanaya gətirirlər, amma artıq bitmişdi. Beyin ölümü baş vermişdi. Həbsxanadakı yoldaşları da deyir ki, biz durumu həbsxana rəsmilərinə bildirdik, amma onlar diqqət yetirmədilər,” Ətazadə söyləyib.

Qasım Ətazadə həmçinin deyib ki, “biz onu həbsxanaya sağlam göndərdik. Onlar ölüsünü bizə təslim etdilər.”

Beynəlxalq insan haqları qurumlarının bildirdiyinə görə, şallaq cəzası çıxaran İran məhkəmələri BMT-nin mülki və siyasi hüquqlar haqqında Beynəlxalq Paktının 7-ci maddəsini pozur. 7-ci maddəyə görə, “heç kəs işgəncə və ya, qəddar, qeyri-insani və ya ləyaqəti alçaldan rəftar və ya cəzaya məruz qalmamalıdır.”

Ədalət