Avropa Vəkillər Şurası və Hüquq Dərnəkləri İran prezidenti Məsud Pezeşkiana məktub ünvanlayaraq həbsdə olan vəkil Məhəmmədrza Fəqihinin vəziyyətindən narahat olduqlarını bildirib və onun dərhal və şərtsiz azadlığa buraxılmasını tələb ediblər.

Məhəmmədrza Fəqihi, vəkil və insan haqları müdafiəçisi, 2025-ci il yanvarın 22-də beş illik həbs cəzasını çəkmək üçün Evin həbsxanasına köçürülüb.

Avropa Hüquq Dərnəkləri bildirib ki, cənab Fəqihinin məhkəmə təqibi 2022-ci ilin oktyabrında “Qadın, Həyat, Azadlıq” etirazları çərçivəsində Tehran Vəkillər Kollegiyasının toplantısına qatılması ilə bağlıdır. Onlar qeyd ediblər ki, Fəqihi daha öncə bu toplantıda həbs olunub və ona qarşı cinayət işi açılıb, lakin “cinayət sübutlarının olmaması” səbəbindən girov qarşılığında azadlığa buraxılıb.

İran məhkəmə sisteminin etirazlarla bağlı elan etdiyi ümumi əfva baxmayaraq, Məhəmmədrza Fəqihinin işi Tehran İnqilab Məhkəməsinin 15-ci şöbəsinə göndərilib və bu, onun məhkum edilməsi və həbs cəzası alması ilə nəticələnib.

Avropa Vəkillər Şurası və Hüquq Dərnəkləri vurğulayıb ki, cənab Fəqihinin məhkumluğu “yalnız vəkil kimi qanuni fəaliyyətlərinə”, o cümlədən insan haqları müdafiəçiləri və siyasi məhbusları müdafiə etməyə çalışmasına əsaslanır.

Bu şura həmçinin narahatlığını ifadə edərək bildirib ki, Məhəmmədrza Fəqihinin məhkum edilməsi və vəkillik hüququndan məhrum edilməsi İran hakimiyyətinin vəkilləri sıxışdırmaq üçün həyata keçirdiyi daha geniş bir kampaniyanın bir hissəsi ola bilər.

Bundan əlavə, 6 fevral 2025-ci il BMT-nin İnsan Haqları Müdafiəçiləri üzrə xüsusi məruzəçisi “Meri Lavlor” sosial şəbəkə platforması X-də paylaşım edərək Məhəmmədrza Fəqihinin beş illik həbs cəzasının icrasına başlanmasından narahatlığını ifadə edib.

Meri Lavlor həmçinin insan haqları vəkilinin iki il müddətinə vəkillik peşəsindən uzaqlaşdırıldığını xatırladıb.

IRANWIRE